საშვილოსნოს მიომა (სინონიმი: ლეიომიომა) არის კეთილთვისებიანი, ჰორმონდამოკიდებული სიმსივნე, რომელიც შედგება კუნთოვანი და შემაერთებელქსოვილოვანი ელემენტებისგან. ფორმალური თვალსაზრისით, როდესაც სიმსივნეში სჭარბობს კუნთოვანი ელემენტები, საუბრობენ "მიომის" არსებობაზე. შემაერთებელქსოვილოვანი სტრომის პრევალირების დროს გამოიყენება ტერმინი "ფიბრომა", ხოლო ორივე სახის ქსოვილის თანაბარი შემცველობის დროს _ "ფიბრომიომა". უკანასკნელი ვარიანტი გვხვდება შემთხვევათა უმრავლესობაში, თუმცა ყველაზე გავრცელებულ ტერმინს დღესდღეობით წარმოადგენს"მიომა".
