ცენტრალური ნერვული სისტემის ინფექციური დაავადებები წარმოადგენენ სხვადასხვა ინფექციური აგენტით გამოწვეულ დაავადებათა უზარმაზარ ჯგუფს. ამ აგენტებს მიეკუთვნება ბაქტერიები, რიკეტსიები, სოკოვანი გამომწვევები, პროტოზოები, ვირუსები და ნელი მოქმედების ვირუსები. ინფექციის ადრეული გამოცნობა და მისი მიზეზის იდენტიფიკაცია ადექვატური მკურნალობის აუცილებელი პირობაა.
ცენტრალური ნერვული სისტემის ინფექციის ძირითად სინდრომებს წარმოადგენს – მენინგიტი, როდესაც ანთებით პროცესში მონაწილეობს გარსები და ენცეფალიტი, როდესაც ანთებითი პროცესი მოიცავს ტვინის ნივთიერებას. ეს ორი სინდრომი შეიძლება ერთდროულადაც განვითარდეს.
